Qizg‘aldoqlar

Qizgʻaldoqlar bahorda

Togʻ bagʻriga yetibdi.

Tarnovlardan nahorda

Tomga chiqib ketibdi.

Tortib ohanrabosi,

Yosh yuraklar choparlar.

Goʻzallik muddaosi —

Choʻgʻdayidan toparlar.

Dillarni etib mushtoq,

Alvonlanib toʻlgʻonar.

Mehr tarab, topib ardoq,

Adirlarda choʻlgʻonar.

Davra olib oʻynashar,

Poylarida ol ranglar.

Shodon qoʻshiq kuylashar,

Taralar shoʻx ohanglar.

Oʻtday yonar togʻlarda

Qizgʻaldoqlar, lolalar.

Soʻlim bahor chogʻlarda

Gulday yashnar bolalar.