JAVOB

Sergey MIXALKOV, rus bolalar shoiri

Kunlarning birida jajji jo‘ja katta Xo‘rozni to‘xtatib, so‘radi:

– Nega Laylakning tumshug‘i bilan oyog‘i uzun, meniki juda kichkina?

– O‘z holimga qo‘y, – deb javob qaytardi Xo‘roz.

– Nima uchun Quyon shalpangquloq, mening hatto qulog‘im ham yo‘q?

– Bas qilsang-chi.

– Nimaga Mushukcha paxmoq, momiqqina, menda esa qandaydir sariq patlar?

– Jonga tegding-ku, – dedi Xo‘roz.

– Kuchukcha dumini likillata oladi, kichik echkining shoxchalari bor, menda shular ham yo‘q.

– Bo‘ldi-da, endi! Jim bo‘l! – g‘azablandi Xo‘roz.

– Nega hamma kattalar kichiklarning savoliga javob beradi-yu, siz bo‘lsangiz "Bas qil... gapirma..." deysiz?

– Chunki sen mendan so‘ramayapsan, ularga hasad qilyapsan.

Bu – Xo‘rozning eng to‘g‘ri javobi edi.Bolalar! Masaldan qanday xulosa chiqardingiz? Matndagi “hasad” so‘zining ma’nosini kattalardan bilib oling.

Rus tilidan

Shahnoza KARIMOVA tarjimasi