BOTIRJON TUFLI OLDI

Bir dam olish kunida

Botir bilan Mavluda

Oyisini qistashib,

Yaxshi tufli istashib,

Magazinga borishdi.

Kirib, hayron qolishdi.

Oyoq kiyimlar qator,

Qaysi razmer desang bor.

Bir-biridan chiroylik,

Hammasi har xil ranglik,

Puxta tikilgan, ixcham,

Tagi qalin, pishiq charm,

Botinka, tufli, sandal,

Etiklarni shu maxal

Sotuvchi uyib qo‘ydi,

Botirga kulib qo‘ydi.

Botirning o‘ynar ko‘zi,

Qaysi birini o‘zi

Tanlashini bilmadi,

Oyisidan so‘radi:

- Ayting, buncha ko‘p mollar?

- Kiyishsin deb bolalar

Ko‘p tikishgan chevarlar,

Usta, mehnatsevarlar.

Botirjon tufli oldi

Uni setkaga soldi.

Ona tutdi qo‘lidan

Yana boshqa bo‘limdan

Olishdi kiyim-kechak,

Ranglari xuddi chechak.

Ona, Botir, Mavluda

Xursand qaytishdi juda.